§6.38.1ἐὰν δέ ποτε ταὐτὰ ταῦτα περὶ πλείους συμβῇ γενέσθαι καὶ σημαίας τινὰς ὁλοσχερῶς πιεσθείσας λιπεῖν τοὺς τόπους, τὸ μὲν ἅπαντας ξυλοκοπεῖν ἢ φονεύειν ἀποδοκιμάζουσι, λύσιν δὲ τοῦ πράγματος εὑρίσκονται συμφέρουσαν ἅμα καὶ καταπληκτικήν. §6.38.2συναθροίσας γὰρ τὸ στρατόπεδον ὁ χιλίαρχος καὶ προαγαγὼν εἰς μέσον τοὺς λελοιπότας, κατηγορεῖ πικρῶς, καὶ τὸ τέλος ποτὲ μὲν πέντε, ποτὲ δʼ ὀκτώ, ποτὲ δʼ εἴκοσι, τὸ δʼ ὅλον πρὸς τὸ πλῆθος αἰεὶ στοχαζόμενος, ὥστε δέκατον μάλιστα γίνεσθαι τῶν ἡμαρτηκότων, τοσούτους ἐκ πάντων κληροῦται τῶν ἀποδεδειλιακότων, §6.38.3καὶ τοὺς μὲν λαχόντας ξυλοκοπεῖ κατὰ τὸν ἄρτι ῥηθέντα λόγον ἀπαραιτήτως, τοῖς δὲ λοιποῖς τὸ μέτρημα κριθὰς δοὺς ἀντὶ πυρῶν ἔξω κελεύει τοῦ χάρακος καὶ τῆς ἀσφαλείας ποιεῖσθαι τὴν παρεμβολήν. §6.38.4λοιπὸν τοῦ μὲν κινδύνου καὶ φόβου τοῦ κατὰ τὸν κλῆρον ἐπʼ ἴσον ἐπικρεμαμένου πᾶσιν, ὡς ἂν ἀδήλου τοῦ συμπτώματος ὑπάρχοντος, τοῦ δὲ παραδειγματισμοῦ τοῦ κατὰ τὴν κριθοφαγίαν ὁμοίως συμβαίνοντος περὶ πάντας, τὸ δυνατὸν ἐκ τῶν ἐθισμῶν εἴληπται καὶ πρὸς κατάπληξιν καὶ διόρθωσιν τῶν συμπτωμάτων.
그러나 만약 이러한 똑같은 일이 더 많은 사람들에게 일어나고, 몇몇 보병중대가 완전히 압박을 받아 자리를 이탈하는 사태가 발생한다면, 그들은 전원을 곤장형에 처하거나 처형하는 것을 피하며, 대신에 유익하면서도 위압감을 주는 해결책을 고안해 낸다. 천인대장은 전군을 소집하고 자리를 이탈한 자들을 중앙으로 데려와 매섭게 질책한 뒤, 마지막에 겁을 먹고 물러선 자들 전원 중에서 제비를 뽑는데, 어떤 때는 다섯 명, 어떤 때는 여덟 명, 어떤 때는 스무 명을, 죄를 지은 자들의 약 10분의 1이 되도록 항상 전체 인원수에 비례하여 조절한다. 그리하여 제비가 뽑힌 자들에게는 방금 언급한 방식에 따라 가차 없이 곤장형을 가하고, 나머지 자들에게는 밀 대신 보리를 식량으로 나누어 주며, 영루와 안전지대 밖에 야영하도록 명령한다. 결국 제비뽑기에 따른 위험과 공포는 누구에게 닥칠지 알 수 없기에 모두에게 동등하게 드리워지고, 보리를 먹어야 하는 불명예는 모두에게 똑같이 닥치게 되므로, 관습을 통해 얻을 수 있는 최대한의 효과가 사람들에게 겁을 주고 과오를 바로잡는 일에 온전히 발휘되는 것이다.