§5.81.1κατὰ δὲ τὸν καιρὸν τοῦτον Θεόδοτος Αἰτωλικῇ μέν, οὐκ ἀνάνδρῳ δʼ ἐπεβάλετο τόλμῃ καὶ πράξει. §5.81.2συνειδὼς γὰρ ἐκ τῆς προγεγενημένης συμβιώσεως τὴν τοῦ βασιλέως αἵρεσιν καὶ δίαιταν ποία τις ἦν, εἰσπορεύεται τρίτος γενόμενος ὑπὸ τὴν ἑωθινὴν εἰς τὸν τῶν πολεμίων χάρακα. §5.81.3κατὰ μὲν οὖν τὴν ὄψιν ἄγνωστος ἦν διὰ τὸ σκότος, κατὰ δὲ τὴν ἐσθῆτα καὶ τὴν ἄλλην περικοπὴν ἀνεπισήμαντος διὰ τὸ ποικίλην εἶναι κἀκείνων τὴν δύναμιν. §5.81.4ἐστοχασμένος δʼ ἐν ταῖς πρότερον ἡμέραις τῆς τοῦ βασιλέως σκηνῆς διὰ τὸ παντελῶς σύνεγγυς γίνεσθαι τοὺς ἀκροβολισμούς, ὥρμησε θρασέως ἐπʼ αὐτήν, καὶ τοὺς μὲν πρώτους πάντας διελθὼν ἔλαθε, §5.81.5παραπεσὼν δʼ εἰς τὴν σκηνήν, ἐν ᾗ χρηματίζειν εἰώθει καὶ δειπνεῖν ὁ βασιλεύς, πάντα τόπον ἐρευνήσας τοῦ μὲν βασιλέως ἀπέτυχε διὰ τὸ τὸν μὲν Πτολεμαῖον ἐκτὸς τῆς ἐπιφανοῦς καὶ χρηματιστικῆς σκηνῆς ποιεῖσθαι τὴν ἀνάπαυσιν, §5.81.6δύο δέ τινας τῶν αὐτοῦ κοιμωμένων τραυματίσας, καὶ τὸν ἰατρὸν τοῦ βασιλέως Ἀνδρέαν ἀποκτείνας, ἀνεχώρησε μετʼ ἀσφαλείας εἰς τὴν ἑαυτοῦ παρεμβολήν, βραχέα θορυβηθεὶς ἤδη περὶ τὴν τοῦ χάρακος ἔκπτωσιν, §5.81.7τῇ μὲν τόλμῃ συντετελεκὼς τὴν πρόθεσιν, τῇ δὲ προνοίᾳ διεσφαλμένος διὰ τὸ μὴ καλῶς ἐξητακέναι ποῦ τὴν ἀνάπαυσιν ὁ Πτολεμαῖος εἰώθει ποιεῖσθαι.
이 무렵, 테오도토스는 에톨리아인답게 대담하면서도 결코 나약하지 않은 계획과 행동에 착수했다. 그는 과거의 친밀한 교제를 통해 왕의 취향과 생활 습관이 어떠한지 잘 알고 있었기 때문에, 새벽녘에 자신을 포함한 세 명의 일행으로 적의 방벽 안으로 침투했다. 그의 용모는 어둠 때문에 식별되지 않았고, 옷차림과 그 밖의 장비에 있어서도 적의 군대 또한 다양한 민족들로 구성되어 있었기에 의심을 사지 않았다. 이전 며칠 동안 소규모 교전들이 매우 가까운 곳에서 벌어졌던 덕분에 왕의 천막 위치를 파악해 두었던 그는, 그곳을 향해 대담하게 돌진하여 첫 번째 위병들을 모두 지나치면서도 들키지 않았다. 그는 왕이 집무를 보고 식사를 하곤 하던 천막으로 잠입하여 모든 곳을 수색했으나, 왕을 찾는 데는 실패했다. 이는 프톨레마이오스가 눈에 띄는 집무용 천막 밖에서 휴식을 취하고 있었기 때문이었다. 그러나 그는 그곳에서 잠자고 있던 왕의 시종 중 두 명에게 부상을 입히고 왕의 주치의 안드레아스를 살해한 뒤, 방벽에서 탈출하는 바로 그 순간에 약간의 혼란을 겪었을 뿐 안전하게 자신의 진영으로 퇴각했다. 그리하여 그는 대담함에 있어서는 목적을 달성했으나, 프톨레마이오스가 평소 어디서 휴식을 취하는지 철저히 조사해 두지 않았던 탓에 주도면밀함에 있어서는 실패하고 말았다.