和平

ἀλλὰ τοῦτό γʼ ἔστʼ Ἰωνικὸν

τὸ ῥῆμʼ.

ἐπίτηδές γʼ, ἵνʼ ὅταν ἐν τἠκκλησίᾳ

ὡς χρὴ πολεμεῖν λέγῃ τις, οἱ καθήμενοι

ὑπὸ τοῦ δέους λέγωσʼ¹ Ἰωνικῶς ὀὶ—

εὖ τοι λέγεις.

καὶ τἄλλα γʼ ὦσιν ἤπιοι.

ὥστʼ ἐσόμεθʼ ἀλλήλοισιν ἀμνοὶ τοὺς τρόπους

καὶ τοῖσι συμμάχοισι πρᾳότεροι πολύ.

ἴθι νυν ἄγʼ ὡς τάχιστα τὸ πρόβατον λαβών·

ἐγὼ δὲ ποριῶ βωμὸν ἐφʼ ὅτου θύσομεν.

ὡς πάνθʼ ὅσʼ ἂν θεὸς θέλῃ χἠ τύχη κατορθοῖ,

χωρεῖ κατὰ νοῦν, ἕτερον δʼ ἑτέρῳ

τούτων κατὰ καιρὸν ἀπαντᾷ.

ὡς ταῦτα δῆλά γʼ ἔσθʼ· ὁ γὰρ βωμὸς θύρασι καὶ δή.

ἐπείγετέ νυν ἐν ὅσῳ

σοβαρὰ θεόθεν κατέχει

πολέμου μετάτροπος αὔρα.

νῦν γὰρ δαίμων φανερῶς

εἰς ἀγαθὰ μεταβιβάζει.

τὸ κανοῦν πάρεστʼ ὀλὰς ἔχον καὶ στέμμα καὶ μάχαιραν,

καὶ πῦρ γε τουτί, κοὐδὲν ἴσχει πλὴν τὸ πρόβατον ὑμᾶς.

οὔκουν ἁμιλλήσεσθον; ὡς

ἢν Χαῖρις ὑμᾶς ἴδῃ,

πρόσεισιν αὐλήσων ἄκλητος,

κᾆτα τοῦτʼ εὖ οἶδʼ ὅτι

φυσῶντι καὶ πονουμένῳ

προσδώσετε δήπου.

ἄγε δὴ τὸ κανοῦν λαβὼν σὺ καὶ τὴν χέρνιβα

περίιθι τὸν βωμὸν ταχέως ἐπιδέξια.

ἰδού· λεγοις ἂν ἄλλο· περιελήλυθα.

φέρε δὴ τὸ δαλίον τόδʼ ἐμβάψω λαβών,

σείου σὺ ταχέως· σὺ δὲ πρότεινε τῶν ὀλῶν,

καὐτός γε χερνίπτου παραδοὺς ταύτην ἐμοί,

καὶ τοῖς θεαταῖς ῥῖπτε τῶν κριθῶν.

ἰδού.

ἔδωκας ἤδη;

νὴ τὸν Ἑρμῆν ὥστε γε

τούτων ὅσοιπέρ εἰσι τῶν θεωμένων

οὐκ ἔστιν οὐδεὶς ὅστις οὐ κριθὴν ἔχει.

οὐχ αἱ γυναῖκές γʼ ἔλαβον.

ἀλλʼ εἰς ἑσπέραν

δώσουσιν αὐταῖς ἅνδρες.

ἀλλʼ εὐχώμεθα.

τίς τῇδε; ποῦ ποτʼ εἰσὶ πολλοὶ κἀγαθοί;

τοισδὶ φέρε δῶ· πολλοὶ γάρ εἰσι κἀγαθοί.

τούτους ἀγαθοὺς ἐνόμισας;

οὐ γάρ, οἵτινες

ἡμῶν καταχεόντων ὕδωρ τοσουτονὶ

ἐς ταὐτὸ τοῦθʼ ἑστᾶσʼ ἰόντες χωρίον;

ἀλλʼ ὡς τάχιστʼ εὐχώμεθʼ.

εὐχώμεσθα δή.

ὦ σεμνοτάτη βασίλεια θεὰ

πότνιʼ Εἰρήνη,

δέσποινα χορῶν, δέσποινα γάμων,

δέξαι θυσίαν τὴν ἡμετέραν.

δέξαι δῆτʼ ὦ πολυτιμήτη

νὴ Δία, καὶ μὴ ποίει γʼ ἅπερ αἱ

μοιχευόμεναι δρῶσι γυναῖκες.

καὶ γὰρ ἐκεῖναι παρακλίνασαι

τῆς αὐλείας παρακύπτουσιν,

κἄν τις προσέχῃ τὸν νοῦν αὐταῖς

ἀναχωροῦσιν,

κᾆτʼ ἢν ἀπίῃ παρακύπτουσιν.

τούτων σὺ ποίει μηδὲν ἔθʼ ἡμᾶς.

μὰ Δίʼ ἀλλʼ ἀπόφηνον ὅλην σαυτὴν

γενναιοπρεπῶς τοῖσιν ἐρασταῖς

ἡμῖν, οἵ σου τρυχόμεθʼ ἤδη

τρία καὶ δέκʼ ἔτη,

λῦσον δὲ μάχας καὶ κορκορυγάς,

ἵνα Λυσιμάχην σε καλῶμεν.

παῦσον δʼ ἡμῶν τὰς ὑπονοίας

τὰς περικόμψους,

αἷς στωμυλλόμεθʼ εἰς ἀλλήλους·

μεῖξον δʼ ἡμᾶς τοὺς Ἕλληνας

πάλιν ἐξ ἀρχῆς

φιλίας χυλῷ καὶ συγγνώμῃ

τινὶ πρᾳοτέρᾳ κέρασον τὸν νοῦν·

καὶ τὴν ἀγορὰν ἡμῖν ἀγαθῶν

ἐμπλησθῆναι, μεγάλων σκορόδων,

σικύων πρῴων, μήλων, ῥοιῶν.

δούλοισι χλανισκιδίων μικρῶν·

κἀκ Βοιωτῶν γε φέροντας ἰδεῖν

χῆνας νήττας φάττας τροχίλους·

καὶ Κωπᾴδων ἐλθεῖν σπυρίδας,

καὶ περὶ ταύτας ἡμᾶς ἁθρόους

ὀψωνοῦντας τυρβάζεσθαι²

Μορύχῳ Τελέᾳ Γλαυκέτῃ, ἄλλοις

τένθαις πολλοῖς· κᾆτα Μελάνθιον

ἥκειν ὕστερον ἐς τὴν ἀγοράν,

τὰς δὲ πεπρᾶσθαι, τὸν δʼ ὀτοτύζειν,

εἶτα μονῳδεῖν ἐκ Μηδείας,

ὀλόμαν ὀλόμαν, ἀποχηρωθεὶς

τᾶς ἐν τεύτλοισι λοχευομένας·

τοὺς δʼ ἀνθρώπους ἐπιχαίρειν.

ταῦτʼ ὦ πολυτίμητʼ εὐχομένοις ἡμῖν δίδου.

λαβὲ τὴν μάχαιραν· εἶθʼ ὅπως μαγειρικῶς

σφάξεις³ τὸν οἶν.

ἀλλʼ οὐ θέμις.

τιὴ τί δή;

οὐχ ἥδεται δήπουθεν Εἰρήνη σφαγαῖς,

οὐδʼ αἱματοῦται βωμός. ἀλλʼ εἴσω φέρων

θύσας τὰ μηρἴ ἐξελὼν δεῦρʼ ἔκφερε,

χοὔτω τὸ πρόβατον τῷ χορηγῷ σῴζεται.

σέ τοι θύρασι χρὴ μένοντα τοίνυν

σχίζας δευρὶ τιθέναι ταχέως

τά τε πρόσφορα πάντʼ ἐπὶ τούτοις.

οὔκουν δοκῶ σοι μαντικῶς τὸ φρύγανον τίθεσθαι;