云

πολλάκις δʼ ἡμῶν ἀγόντων τῶν θεῶν ἀπαστίαν,

ἡνίκʼ ἂν πενθῶμεν ἢ τὸν Μέμνονʼ ἢ Σαρπηδόνα,

σπένδεθʼ ὑμεῖς καὶ γελᾶτʼ· ἀνθʼ ὧν λαχὼν Ὑπέρβολος

τῆτες ἱερομνημονεῖν, κἄπειθʼ ὑφʼ ἡμῶν τῶν θεῶν

τὸν στέφανον ἀφῃρέθη·¹ μᾶλλον γὰρ οὕτως εἴσεται

κατὰ σελήνην ὡς ἄγειν χρὴ τοῦ βίου τὰς ἡμέρας.

μὰ τὴν Ἀναπνοὴν μὰ τὸ Χάος μὰ τὸν Ἀέρα

οὐκ εἶδον οὕτως ἄνδρʼ ἄγροικον οὐδένα

οὐδʼ ἄπορον οὐδὲ σκαιὸν οὐδʼ ἐπιλήσμονα·

ὅστις σκαλαθυρμάτιʼ ἄττα μικρὰ μανθάνων

ταῦτʼ ἐπιλέλησται πρὶν μαθεῖν· ὅμως γε μὴν

αὐτὸν καλῶ θύραζε δευρὶ πρὸς τὸ φῶς.

ποῦ Στρεψιάδης; ἔξει τὸν ἀσκάντην λαβών;

ἀλλʼ οὐκ ἐῶσί μʼ ἐξενεγκεῖν οἱ κόρεις.

ἀνύσας τι κατάθου καὶ πρόσεχε τὸν νοῦν.

ἰδού.

ἄγε δὴ τί βούλει πρῶτα νυνὶ μανθάνειν

ὧν οὐκ ἐδιδάχθης πώποτʼ οὐδέν; εἰπέ μοι.

πότερα περὶ μέτρων ἢ περὶ ἐπῶν ἢ ῥυθμῶν;

περὶ τῶν μέτρων ἔγωγʼ· ἔναγχος γάρ ποτε

ὑπʼ ἀλφιταμοιβοῦ παρεκόπην διχοινίκῳ.

οὐ τοῦτʼ ἐρωτῶ σʼ, ἀλλʼ ὅ τι κάλλιστον μέτρον

ἡγεῖ· πότερα τὸ τρίμετρον ἢ τὸ τετράμετρον;

ἐγὼ μὲν οὐδὲν πρότερον ἡμιεκτέου.

οὐδὲν λέγεις ὦνθρωπε.

περίδου² νυν ἐμοί,

εἰ μὴ τετράμετρόν ἐστιν ἡμιεκτέον.

ἐς κόρακας, ὡς ἄγροικος εἶ καὶ δυσμαθής.

ταχύ γʼ ἂν δύναιο μανθάνειν περὶ ῥυθμῶν.

τί δέ μʼ ὠφελήσουσʼ οἱ ῥυθμοὶ πρὸς τἄλφιτα;

πρῶτον μὲν εἶναι κομψὸν ἐν συνουσίᾳ,

ἐπαΐονθʼ ὁποῖός ἐστι τῶν ῥυθμῶν

κατʼ ἐνόπλιον, χὠποῖος αὖ κατὰ δάκτυλον.

κατὰ δάκτυλον; νὴ τὸν Δίʼ, ἀλλʼ οἶδʼ.

εἰπὲ δή.

τίς ἄλλος ἀντὶ τουτουὶ τοῦ δακτύλου;

πρὸ τοῦ μέν, ἔτʼ ἐμοῦ παιδὸς ὄντος, οὑτοσί.

ἀγρεῖος εἶ καὶ σκαιός.

οὐ γὰρ ᾠζυρὲ

τούτων ἐπιθυμῶ μανθάνειν οὐδέν.

τί δαί;

ἐκεῖνʼ ἐκεῖνο, τὸν ἀδικώτατον λόγον.

ἀλλʼ ἕτερα δεῖ σε πρότερα τούτου μανθάνειν,

τῶν τετραπόδων ἅττʼ ἐστὶν ὀρθῶς ἄρρενα.

ἀλλʼ οἶδʼ ἔγωγε τἄρρενʼ, εἰ μὴ μαίνομαι·

κριὸς τράγος ταῦρος κύων ἀλεκτρυών.

ὁρᾷς ὃ πάσχεις; τήν τε θήλειαν καλεῖς

ἀλεκτρυόνα κατὰ ταὐτὸ καὶ τὸν ἄρρενα.

πῶς δὴ φέρʼ;

ὅπως; ἀλεκτρυὼν κἀλεκτρυών.

νὴ τὸν Ποσειδῶ. νῦν δὲ πῶς με χρὴ καλεῖν;

ἀλεκτρύαιναν, τὸν δʼ ἕτερον ἀλέκτορα.

ἀλεκτρύαιναν; εὖ γε νὴ τὸν Ἀέρα·

ὥστʼ ἀντὶ τούτου τοῦ διδάγματος μόνου

διαλφιτώσω σου κύκλῳ τὴν κάρδοπον.

ἰδοὺ μάλʼ αὖθις τοῦθʼ ἕτερον· τὴν κάρδοπον

ἄρρενα καλεῖς θήλειαν οὖσαν.

τῷ τρόπῳ

ἄρρενα καλῶ ʼγὼ κάρδοπον;

μάλιστά γε,

ὥσπερ γε καὶ Κλεώνυμον.

πῶς δή; φράσον.

ταὐτὸν δύναταί σοι κάρδοπος Κλεωνύμῳ.

ἀλλʼ ὦγάθʼ οὐδʼ ἦν κάρδοπος Κλεωνύμῳ,

ἀλλʼ ἐν θυείᾳ στρογγύλῃ γʼ ἂν ἐμάττετο.

ἀτὰρ τὸ λοιπὸν πῶς με χρὴ καλεῖν;

ὅπως;

τὴν καρδόπην, ὥσπερ καλεῖς τὴν Σωστράτην.

τὴν καρδόπην θήλειαν;

ὀρθῶς γὰρ λέγεις.

ἐκεῖνο δʼ ἦν ἄν, καρδόπη, Κλεωνύμη.

ἔτι δή γε περὶ τῶν ὀνομάτων μαθεῖν σε δεῖ,

ἅττʼ ἄρρενʼ ἐστίν, ἅττα δʼ αὐτῶν θήλεα.

ἀλλʼ οἶδʼ ἔγωγʼ ἃ θήλεʼ ἐστίν.

εἰπὲ δή.

Λύσιλλα Φίλιννα Κλειταγόρα Δημητρία.

ἄρρενα δὲ ποῖα τῶν ὀνομάτων;

μυρία.

Φιλόξενος Μελησίας Ἀμυνίας.

ἀλλʼ ὦ πόνηρε ταῦτά γʼ ἐστʼ οὐκ ἄρρενα.

οὐκ ἄρρενʼ ὑμῖν ἐστιν;

οὐδαμῶς γʼ, ἐπεὶ

πῶς ἂν καλέσειας³ ἐντυχὼν Ἀμυνίᾳ;

ὅπως ἄν; ὡδί, δεῦρο δεῦρʼ Ἀμυνία.

ὁρᾷς; γυναῖκα τὴν Ἀμυνίαν καλεῖς.

οὔκουν δικαίως ἥτις οὐ στρατεύεται;

ἀτὰρ τί ταῦθʼ ἃ πάντες ἴσμεν μανθάνω;

οὐδὲν μὰ Δίʼ ἀλλὰ κατακλινεὶς δευρὶ —

τί δρῶ;

ἐκφρόντισόν τι τῶν σεαυτοῦ πραγμάτων.

μὴ δῆθʼ ἱκετεύω σʼ ἐνγεταῦθʼ· ἀλλʼ εἴ γε χρή,

χαμαί μʼ ἔασον αὐτὰ ταῦτʼ ἐκφροντίσαι.

οὐκ ἔστι παρὰ ταῦτʼ ἄλλα.